बाइकको तेल र मर्मतको नाममा बिल बेगर नै मान बहादुरले ८५,५०० गोजीमा हालेको खुलासा

काभ्रे । खानीखोला गाउँपालिकाका वडा नं. ६ का पूर्व वडाध्यक्ष मान बहादुर गोलेले बाइकको तेल (इन्धन) र मर्मतको नाममा ८५ हजार पाँच सय रकम गोजीमा हालेको खुलासा भएको छ ।

बिल बेगर नै मान बहादुरले उक्त रकम सिधै गोजीमा हालेको खुलासा भएको हो । आफ्नो पालामा पालिकाको हर्ताकर्ता देखिएका उनले २०७८ साल पुस २१ गते इन्धन बापत रु. ४० हजार र मर्मत बापत ४५५०० रुपियाँ बुझिलिएको खुलेको हो ।

उल्लिखित रकमको कुनै पनि बिल भने पेश भएको छैन । मानबहादुरले लिएको उक्त रकम गैर कानुनी भएको भन्दै महालेखा परीक्षकको कार्यालयले असुल उपर गर्न समेत ताकेता गरेको छ ।

यसबाहेक पनि गोलेको संलग्नता देखाएर अन्य विभिन्न शीर्षकहरुको बजेट हिनामिनाको विषय महालेखाले उठाएको छ ।

यस विषयमा बुझ्न खोज्दा गोलेले भने बिल कतै परेको हुन सक्ने बताए । भन्छन्, ‘त्यस्तो नुहुनुपर्ने हो, बिल गायब भयो कि त !’

विश्वस्त स्रोतका अनुसार भने कर्मचारीलाई दबाब र प्रभावमा राखेर मानबहादुरले उक्त रकम बुझिलिएको पाइएको छ ।