आज माझी समुदायको मुख्य पर्व लादी मनाइँदै, खानीखोला–४ सहित देशका विभिन्न पालिकामा सार्वजनिक बिदा

खानीखोला, काभ्रे । आन देशभर उल्लासका साथ माझी समुदायको मुख्य पर्व लादी (कोसी पूजा) मनाइदै छ । माझी समुदायले प्रत्येक वर्ष फागुन महिनाको तेस्रो मङ्गलवार विशेष पर्वको रूपमा लदी पर्व मनाउने गर्दछन् ।

यही सन्दर्भमा देशका विभिन्न पालिकाले सार्वजनिक बिदा दिएको छ । यससँगै काभ्रे जिल्लाका डँडापारि क्षेत्रमा पर्ने खानीखोला गाउँपालिकाको वडा नं. ४ ले पनि आज वडाभर सार्वजनिक बिदा दिने निर्णय गरेको छ ।

लदी पर्वको अवसरमा माझी समुदायको बाक्लो बसोबास रहेको वडा भएकाले उक्त समुदायको सम्मानका लागि बिदा दिएको अध्यक्ष निसान मोक्तानले जानकारी दिए । लदी पर्वको दिन वडा भित्र रहेको विद्यालय, संघसंस्था र सरकारी कार्यलयहरु बिदा हुनेछन् ।

माझी समुदायको मुख्य पेसा नदीमा डुङ्गा तार्ने, माछा मार्ने रहँदै आएको छ । जसअनुसार नदीमा माछा मार्दा र डुङ्गा तार्दा नबगाओस् भन्ने कामनासहित वर्षेनी माझी समुदायले लदी पर्वको दिन विशेष पूजाआजा गर्दै आएका छन् ।

माझी समुदायले त्यो दिन खोलाको संगममा सामूहिक विशेष पूजाआजा गर्दै खोलालाई बोका, कुखुरा र परेवाको बली दिने गर्छन् । लादी पर्वको अवसरमा शुभकामना दिँदै संघीय सांसद उर्मिला माझीले यो पर्वलाई राष्ट्रिय पर्वको रुपमा विकास गर्नुपर्ने बताएकी छन् ।