चौरीदेउराली गाउँपालिकाका पूर्ण अपांगलाई न्यानो वितरण

चौरीदेउराली, काभ्रे । काभ्रे जिल्लाको चौरीदेउराली गाउँपालिकाको अध्यक्ष रेणुका चौलागाईंले आफ्नो गाउँपालिकाको पूर्ण अपांगता भएका व्यक्तिहरूलाई ब्लाङकेट (न्यानो) वितरण गरेको छ । यही माघ १५ गतेबाट सुरु गर्नुभई ९ वटै वडाका १०० जना पूर्ण अपांगतालाई ब्लाङकेट वितरण गरेको हो ।

ब्लाङ्केट वितरणको क्रममा गाउँपालिकाको अध्यक्ष रेणुका चौलागाईं प्रायःजसो अपांग भएको व्यक्तिको घर घरमा पुग्नु भएर अपांग भएको व्यक्ति र उक्त घर परिवारहरूको समस्या, पीडा र मर्मलाई प्रत्येक्ष रूपमा बुझ्नु भएको थियोे। अपांग भएका व्यक्तिहरूलाई सहयोगको लागि गाउँपालिकाको तर्फबाट ब्लाङकेट वितरण गर्नुभएको थियो ।

गाउँपालिकाको अध्यक्ष चौलागाईंले ब्लाङ्केट वितरणको क्रममा अपांग र अपांगता भएको परिवारको समस्याहरुको बारेमा विभिन्न बस्तीहरूमा छलफल पनि गर्नु भएको थियो । कार्यक्रमबाट लाभान्वित परिवार र अपांग व्यक्तिहरूले गाउँपालिकाको यस कार्यक्रमबाट प्रभावित भइ गाउँपालिका अध्यक्ष रेणुका चौलागाईंको प्रसंसा गर्दै आफूहरू सहयोग गर्नुभएकोमा भावुक भइ अध्यक्षप्रति आभार व्यक्त गर्नुभएका थिए। गाउँपालिका अध्यक्ष चौलागाईंले अपांगहरू सेवा र सहयोग लागि पालिका र आफू समर्पित भएर लाग्ने प्रतिज्ञा गर्नुभयो।

ब्लाङ्केट वितरण कार्यक्रम प्रत्येक्ष सहजीकरण गाउँ पालिका पञ्जिकरण शाखामा कार्यरत उर्मिला परियारले गर्नुभएको थियो । कार्यक्रमलाई सफल बनाउनको लागि उर्मिला परियारले कार्यक्रमको व्यवस्थापन र ब्लाङ्केट वितरण कार्यमा ९वटै वडाहरूको विभिन्न बस्तीहरूमा पुगेर आफैं खटेर प्रभावकारी र महत्त्वपूर्ण भूमिका निर्वाह गर्नुभएको थियोे।

यस ब्लाङ्केट वितरण कार्यक्रम सम्पन्न गर्नको लागि ८ नं. वडाको अध्यक्ष एवं गाउँ पालिकाको प्रवक्ता धन लामा, ३नं. वडा अध्यक्ष चित्र प्रसाद चौलागाईं, ५नं. वडा अध्यक्ष कृष्ण प्रसाद गौतम ,९ नं. वडाका अध्यक्ष राम लामा, चौरीदेउराली (२ वडा स्थित खाँडा देवी मा.वि.का शिक्षक एवं समाजसेवी कलम नेपाली र गाउँपालिकामा कार्यरत पुष्कर लामाले महत्त्वपूर्ण साथ र सहयोग गर्नुभएको थियो ।